కార్యకర్తల భుజాలపై ఎన్నికల భారం.. నాయకత్వం ఎక్కడ? ఇదే ఇప్పుడు అసలు ప్రశ్న!..

సత్యవేడు నియోజకవర్గం:-

*రాజకీయాల్లో గెలుపు కోసం వ్యూహాలు ఉండొచ్చు.. అభ్యర్థుల ఎంపికలో పోటీ ఉండొచ్చు.. ఆధిపత్యం కోసం అంతర్గత పోరు కూడా సాగొచ్చు! కానీ ఎన్నికల వేళ కార్యకర్తలకు అండగా నిలవాల్సిన నాయకులే కనిపించకపోతే.. ఆ రాజకీయాన్ని ఏమనాలి? ప్రస్తుతం సత్యవేడు నియోజకవర్గంలో స్థానిక సంస్థల ఎన్నికల నేపథ్యంలో నెలకొన్న పరిణామాలు ఇలాంటి ప్రశ్నలనే సంధిస్తున్నాయి.*

ఐ ఎన్ బి టైమ్స్, సత్యవేడు, అక్టోబర్ 28: ఎంపీటీసీ, జడ్పీటీసీ అభ్యర్థుల ఖరారు నుంచి బీ-ఫామ్‌ల పంపిణీ వరకు రెండు ప్రధాన రాజకీయ శిబిరాల్లోనూ చివరి క్షణం వరకు నాటకీయ పరిణామాలు చోటుచేసుకున్నాయనే చర్చ రాజకీయ వర్గాల్లో వినిపిస్తోంది. ఫలితంగా మనస్పర్థలు పెరిగి, వర్గ విభేదాలు తారస్థాయికి చేరినట్లు కనిపిస్తోంది. నామినేషన్ల పర్వం ముగిసింది.. ఎన్నికల ప్రచారం మొదలైంది.. కానీ కొన్ని చోట్ల అభ్యర్థులే తమకు తాముగా ప్రచార బాధ్యతలు మోస్తుండటం చర్చనీయాంశంగా మారింది.

*అసలు కొసమెరుపు ఏమిటంటే..*

అభ్యర్థుల గెలుపు కోసం నియోజకవర్గ స్థాయిలో చురుకుగా పర్యటించాల్సిన కీలక నాయకుల జాడ మాత్రం ఆశించిన స్థాయిలో కనిపించడం లేదనే విమర్శలు వినిపిస్తున్నాయి. గతంలో స్థానిక ఎన్నికలంటే మండల స్థాయి సమావేశాలు, కార్యకర్తల సందడి, నాయకుల హడావుడి, వ్యూహాత్మక చర్చలతో రాజకీయ వాతావరణం వేడెక్కేది. ఇప్పుడు మాత్రం ఎక్కడ తమకు వర్గ విభేదాల సెగ తగులుతుందోనన్న ఆందోళనతో కొందరు నేతలు నియోజకవర్గానికి దూరంగా ఉంటున్నారా? అనే ప్రశ్నలు ఉత్పన్నమవుతున్నాయి.

ఒకవేళ వచ్చినా.. వచ్చిన సంగతి తెలియదు, వెళ్లిన సంగతి తెలియదు అన్నట్టుగా పరిస్థితి ఉందనే సెటైర్లు కూడా రాజకీయ వర్గాల్లో వినిపిస్తున్నాయి. ఎన్నికల బరిలో అభ్యర్థులు ఉంటే.. వారికి భరోసా ఇవ్వాల్సిన నాయకత్వం ఎక్కడుంది? అన్నదే ఇప్పుడు కార్యకర్తల మనసుల్లో మెదులుతున్న ప్రశ్న.

*నిజానికి నాయకుడు అంటే పదవిలో ఉన్న వ్యక్తి మాత్రమే కాదు..* కష్టకాలంలో కార్యకర్తకు అండగా నిలిచేవాడు. గెలుపు అవకాశాలు కనిపించినప్పుడు ముందుండటం కాదు.. ప్రతికూల పరిస్థితుల్లోనూ తన శ్రేణుల వెన్నంటి నిలబడటమే నిజమైన నాయకత్వ లక్షణం. కార్యకర్తలను తన భుజాలపై మోసే నాయకుడే చరిత్రలో నిలుస్తాడు.. కార్యకర్తల భుజాలపై ఎక్కి సవారీ చేసేవాడు కాదు!

కాలం మారిందా? రాజకీయ సంప్రదాయాలు మారాయా? నాయకుల ఆలోచనా విధానాలు మారాయా? అనే ప్రశ్నలకు సమాధానం వెతకాల్సిన అవసరం ఉంది. పార్టీలు మారవచ్చు.. ఎన్నికల వ్యూహాలు మారవచ్చు.. కానీ కార్యకర్తల కష్టం, వారి పట్టుదల, వారిని ఆదరించే ప్రజల ఆశలు మారిపోలేదు. మారుతున్నది నాయకత్వం వ్యవహరిస్తున్న తీరేనా? అన్న ఆత్మపరిశీలన ప్రతి నాయకుడికీ అవసరం.

*మరో ముఖ్యమైన విషయం..* ప్రజాస్వామ్యంలో విమర్శలను స్వీకరించే సహనం కూడా నాయకత్వానికి ఒక పరీక్షే. వార్తలో విమర్శ ఉన్నా, ప్రశంస ఉన్నా, దాన్ని హుందాగా స్వీకరించి లోపాలను సరిదిద్దుకునేవారే రాజకీయంగా ఎదుగుతారు. బలహీనతలను ఎత్తిచూపితే కన్నెర్ర చేయడం, ప్రశ్నించిన వారిపై అక్కసు పెంచుకోవడం తాత్కాలిక ఆవేశాన్ని చూపవచ్చు.. కానీ అది దీర్ఘకాల రాజకీయ ప్రయాణానికి మేలు చేయదు.

గతంలో ప్రజల మధ్య పనిచేసి గుర్తింపు పొందిన నాయకుల నుంచి నేర్చుకోవాల్సిన పాఠాలు ఎన్నో ఉన్నాయి. ప్రజలను పలకరించడం, కార్యకర్తలను గౌరవించడం, విమర్శలను విశ్లేషించుకోవడం, అవసరమైనప్పుడు ముందుండి పోరాడటం.. ఇవే నాయకుడికి నిజమైన బలాలు.

 *ఏది ఏమైనా*

 ఎన్నికల్లో బీ-ఫామ్‌ అభ్యర్థికి దక్కవచ్చు.. కానీ ప్రజల మనసుల్లో స్థానం మాత్రం నాయకత్వం సంపాదించుకోవాలి!

సత్యవేడులో ప్రస్తుతం కనిపిస్తున్న రాజకీయ పరిణామాలు నాయకులందరికీ ఒక సందేశాన్ని ఇస్తున్నాయి. ఎన్నికలు వచ్చినప్పుడు మాత్రమే కార్యకర్తలు గుర్తుకొస్తే సరిపోదు.. వారి కష్టంలోనూ, నష్టంలోనూ, పోరాటంలోనూ తోడుగా ఉండాలి. ఎందుకంటే ఎన్నికల్లో అభ్యర్థి గెలవడం ఒక విజయం కావచ్చు.. కానీ కార్యకర్తల విశ్వాసాన్ని గెలుచుకోవడమే నిజమైన నాయకత్వ విజయం!